हिमाल हेर्दै पर्यटक

पछिल्लो सयम चर्चामा रहेको घरबास हो बागलुङ भकुण्डेको अतिथि सत्कार घरबास– घरबासमा पछिल्लो समय स्वदेशी मात्रै नभएर विदेशी पर्यटकसमेत आउने गरेका छन् । प्रकृतिकरुपमा विधिकिरणका कारण भकुण्डेले विदेशी पर्यटकलाई मोहनी लगाएको छ। घरबासमा पुगेका विदेशी पर्यटकले अर्गानिक खानाका परिकारसँगै हिमाल हेर्न पाउने भएपछि भकुण्डे पुग्ने जो कोही पर्यटकले घरबासको प्रशंसा गरेकै हुन्छन्। 
 
केही पर्यटक हेलिकाेप्टरमार्फत घरवासमा आएका छन् । तर, पाँच वर्षदेखि नियमित रूपमा भकुन्डे आइरहने विदेशी पर्यटक भने विश्व भेगन अर्गनाइजेसनमा आबद्ध छन् । बागलुङ नगरपालिका– १० पर्यटकीय गाउँ भकुन्डेमा अहिले युकेका पाँचजना र अमेरिकाका एक गरी ६ जना विदेशी पर्यटक पुगेका छन् । उनीहरुले यहाँबाट देखिने हिमालले मोहनी प्रतिक्रिया दिएका छन् । बुधबार मात्रै पर्यटन व्यवसायी महादेव शर्माको नेतृत्वमा भकुन्डे पुगेका छ विदेशी पर्यटक तीन दिन घरवासमै बस्नेछन् । उनीहरूको पहिलो रोजाइ हिमालको दृश्य परेको छ । बिहान उठ्नासाथ आँखैअघिका हिमाल देख्दै अर्गानिक साग, सिस्नु, कोदो र भट्टको परिकार खाँदा छुट्टै आनन्द आएको युकेदेखि भकुन्डे घुम्न आएका म्यागीले प्रतिक्रिया दिए। 

‘आफूले भकुन्डेको तस्बिर र भिडियो देखेकै कारण यहाँ आएको थिएँ, पुराना घर स्वच्छ, हरियाली वातावरणमा बसेर हिमाल हेर्दा निकै आनन्द लाग्यो,’ म्यागीले भने, ‘यस ठाउँमा आउने जो कोहीले यो रमाइलो पल बिर्सन सकिँदैन होला ।’ विदेशी पाहुनाले घरवास सञ्चालकसँगै कोदो टिप्ने, साग केलाउने र अन्य घरायसी काममासमेत सघाउने गरेका छन् । घरवासमा विदेशी पर्यटकको आठौँ समूह लिएर आएको पर्यटन व्यवसायी महादेव शर्माले बताए। 

 शर्माले भेगन समूहमा आबद्ध विश्वका पर्यटक एकपटक भकुन्डे आउने चाहना व्यक्त गरेको बताए। उनले यहाँबाट देखिने हिमाल, सनराइज र सनसेट, हरियाली वातावरण र सिस्नो, ढिँडो र गुन्द्रुकलगायतको परिकारले पाहुनालाई मोहनी लगाउने गरेको जानकारी दिए। शर्माकै पहलमा भकुन्डेमा पाँच वर्षअघि मात्रै विदेशी पर्यटक भित्रिएका थिए । बागलुङको भकुन्डे गाउँको अतिथि सत्कार होमस्टे (घरवास) रोजाइमा पर्नुको काराण यहाँको आतिथ्यता, कला संस्कृति र प्राकृतिक मनोरमको दृश्य रहेको अनुभव शर्माले सुनाए। 

उनले भकुन्डे आएको पाहुनालाई आगमी वर्षदेखि मुस्ताङसमेत लैजाने गरी समय थप गर्ने बताए। भकुन्डे जिल्ला सदरमुकामदेखि तीन घण्टाको पैदलमार्फत पुग्न सकिन्छ । अतिथि सत्कार घरवासका सञ्चालक याम थापाले पछिल्लो समय स्वदेशी पर्यटक मात्रै नभएर अमेरिका, युके, क्यानडा, जापान, चीन र कोरियाबाट विदेशी पर्यटक आउने गरेको बताए। 

उनीहरूले आफ्नो घरको आगनबाट देखिने धौलागिरि, अन्नपूर्ण र माछापुच्छ्रे हिमशृंखलाले मोहनी लगाउने गरेको बताउने गरेको थापाको भनाइ छ । ‘संस्थागत रूपमा महादेशव शर्माको पहलमा यहाँ विदेशी आउन थाल्नुभयो, अन्य संघसंस्थाबाट आउनुभएका विदेशी पर्यटकलाईसमेत भकुन्डे घुमाउन ल्याउनुहुन्छ, अहिले घरवासमा स्वदेशी र विदेशी पर्यटक दुवैको आकर्षण छ, यहाँ अर्गानिक खानाको परिकार र प्राकृतिक दृश्य नै पहिलो रोजाइ हो,’ घरवास सञ्चालक थापाले भने, ‘भेगनमा आबद्ध पर्यटकले हामीलाई खान बनाउनेदेखि खेतबारीको काममा समेत सघाउन खोज्नुहुन्छ, उनीहरूले यहाँको कामको विषयमा जान्न खोज्नुहुन्छ, गाउँमा बसेर विदेशी पर्यटकलाई घरवासको माध्यमबाट स्वागत सत्कार गर्न पाउनु हाम्रो लागि गौरवको विषय हो ।’

नेपालको खेतीपाती र कला–संस्कृतिका विषयमा बाह्य पर्यटकलाई चासो हुने भएकाले उनीहरूले परीक्षण गर्ने र खेतीपातीको विषयमा जानकारी दिनसमेत कोदोबारीमा पुग्ने गरेको पाइन्छ ।

मासु तथा मासुजन्य पदार्थ उपभोग नगर्ने भेगनमा आबद्ध विदेशी पर्यटकले त्यहाँको समुदाय र विद्यालयलाई समेत विभिन्न सहयोगसमेत गर्दै आएका छन् । बाह्य पर्यटकको मुख्य रोजाइमा  हिमशृंखला, खानपान र कला–संस्कृति नै रहेको थापाले बताए । घरबासमा एक रातमा ८० जना पर्यटक बस्ने व्यवस्था छ । 

घरवास सञ्चालकले गाउँमै उत्पादित आलु, भटमास, मकै, मुला, कोदोको ढिँडो, सिस्नो र गुन्द्रुकको स्वाद लिन पाइन्छ । २०७३ सालमा स्थापना भएको जिल्लाकै पहिलो अतिथि सत्कार घरवासमा मगर समुदायका १५ घर समावेश गरिएका छन् । घरवास सञ्चालनमा आएसँगै यहाँका स्थानीयहरू खेतीपातीको कामसँगै आयआर्जनमा जोडिएका हुन् । भुकन्डेको शिरमा रहेको मुलाबारी भ्युटावर, मध्यभागमा रहेको बराह ताल पर्यटक लोभ्याउने अतिरिक्त माध्यमसमेत रहेका छन्।