आगामी आर्थिक वर्षको लागि ढकारीले ल्यायो ४३ करोड दुई लाख रुपैयाँको बजेट

अछामको ढकारी गाउँपालिकाले आगामी आर्थिक वर्ष २०८२/०८३ का लागि ४३ करोड दुई लाख दुईहजार रुपैयाँको बजेट सार्वजनिक गरेको छ । मंगलबार सम्पन्न १५ औं गाउँसभामा उपाध्यक्ष नेत्रकलादेबी शाहीले चालु तर्फ ३४ करोड १२ लाख ७१ हजार ६ सय र पुजीगत आठ करोड ३९ लाख ३० हजार चारसय गरी जम्मा ४३ करोड दुई लाख दुईहजार रुपैयाँको बजेट सार्वजनिक गरेकि हुन् ।

यो बजेट चालु आर्थिक वर्षको भन्दा करिब दुई करोड २० लाख ६३ हजार सातसयले बढी हो । ढकारीले २०८२/०८३ का लागि पालिकाका आठवटा वडाका लागि दुई करोड १२ लाख ४९ हजार बिनियोजन गरेको छ ।

आर्थिक विकासका लागि ३३ लाख ३३ हजार बजेट छुट्याएको ढकारीले सामाजिक विकासका लागि पाँच करोड ३९ लाख दश हजार बजेट विनियोजन गरेको छ । त्यस्तै पूर्वाधार विकास तर्फ पाँच करोड पाँच लाख ७१ हजार बजेट विनियोजन गरिएको छ ।

१५ औं गाउँसभा मार्फत कृषि विकास, पशु सेवा, स्वास्थ्य, उद्यम विकास, विपद् व्यवस्थापन, सहकारी, शिक्षा युवा तथा खेलकुद, महिला बालबालिका तथा ज्येष्ठ नागरिक, पोषण, भूमि व्यवस्थापन र स्वरोजगार जस्ता विषयलाई मुख्य प्राथमिक्तामा राखिएको गाउँपालिकाका अध्यक्ष प्रकाश बहादुर साउँदले बताए । उनका अनुसार यो वर्ष गाउँपालिकाले सुत्केरी महिलाहरुका लागि महत्वकांक्षी कार्यक्रम सुरु गरेको छ । उनीहरुका लागि हातको हात सुत्केरी खर्च उपलब्ध गराइने छ ।

अध्यक्ष साउँदका अनुसार नियमित गर्भ जाँच गराएर सुत्केरी हुने महिलाहरुको हक दुईहजार ८ सय र संस्थागत सुत्केरी मात्र भएकाको हकमा दुईहजार उपलब्ध गराइने छ । ढकारीले यसअघि देखि नै गर्भवतीका लागि एकहजारका दरले भत्ता समेत दिदै आएको छ ।

स्वास्थ्य तर्फ नै गर्भवती महिलाहरुकै लागि भिडियो एक्सरे सेवा पनि सुरु गर्न लागिएको सभामा अध्यक्ष साउँदले बताए ।

वडा तहमा विनियोजन गरिएको बजेट अन्तरगत वडा नम्बर १ र २ मा १६÷१६ योजना, वडा नम्बर ३ मा २१, वडा नम्बर ४ मा १०, वडा नम्बर ५ मा १०, वडा नम्बर ६ मा १७, वडा नम्बर ७ मा १० र वडा नम्बर ८ मा तीनवटा योजना पारित गरिएको छ ।