संसदीय समितिले आज जनार्दन शर्मा संग सोधपुछ गर्ने

काठमाडौं । तत्कालिन अर्थमन्त्री जनार्दन शर्मालाई आज बिहीबार संसदीय छानबिन विशेष समितिले सोधपुछ गर्ने भएको छ ।
अर्थ मन्त्रालयभित्र अनधिकृत घुसपैठसम्बन्धी समाचार लेख्ने अन्नपूर्ण पोष्ट दैनिकमा कार्यरत दुई पत्रकार सुरेन्द्र काफ्ले र ममता थापासँग समितिले बुधबार सोधपुछ गरेको समितिका सचिव सुरेन्द्र अर्यालले बताए ।
सचिव अर्यालले छानबिनको लागि संसदले दिएको १० दिन समय नपुग्ने भन्दै म्याद थपको विषयमा छलफल भएको र दिन किटान बारे टुंगोमा पुग्न नसकेको बताए ।
समितिले म्याद थपको विषयमा छलफल मात्रै भएको भनिए पनि ७ दिन म्याद थप गर्न सभामुखलाई आग्रह गर्ने संकेत गरेको छ । सभामुख अग्निप्रसाद सापकोटाले संसदीय समितिलाई छानबिनका लागि दिएको १० दिनको समय सकिन अब दुई दिन मात्रै बाँकी छ ।