मेयर हर्क साम्पाङ धरानमा पानी ल्याउन सफल भए

काठमाडौं । धरानका मेयर हर्क साम्पाङ आफ्नो पानी ल्याउने योजनामा सफल भएका छन् ।
उनले चुनावको बेला धरानमा पानीको समस्या समाधान गर्ने बाचा गरेका थिए । मेयर निर्वाचित भएलगत्तै उक्त बाचा पूरा गर्न कस्सिएका साम्पाङले अन्ततः खर्दु र निशाने खोलाको पानी धरान बजार ल्याउन सफल भएका हुन् ।
मेयर साम्पाङले आफु सहित अन्य सहयोगीहरु धरान बजारमा पुगेको पानीको ठुलो धारामा नुहाउदै गरेको भिडियो फेसबुकमा रखानेर खुसी व्यक्त गरेका छन् ।
उनले अहिले खर्दु र निशानेलाई मात्रै जोडेको बताउदै सर्दु जोड्न बाँकी रहेको पनि सामाजिक संजालमै उल्लेख गरेका छन् ।
पानी बजारमै आइपुगेपछि मेयर साम्पाङसहित धरानवासी पाइपको धारामा फोहोरामा भिजेर रमाइलो गरिरहेको उनको भिडियोमा देखिन्छ ।
उनले पोष्ट गरेको भिडियोमा धेरैले बधाई दिंदै कमेन्ट गरेका छन् । वर्षको १२ महिना नै पानी अभाव हुन नदिनेगरी दिगो व्यवस्थापन गर्न समेत उनलाई कमेन्टमा सुझाब दिइएको छ ।
यसअघि केहि समय ब्यापक आलोचना खेपेका मेयर साम्पाङको पानी ल्याउने योजना सफल भएपछि भने धरानका स्थानीयले उनको खुलेर प्रशंसा गरिरहेका छन् । यो सफलतापछि उनी फेरि एक पटक चर्चामा आएका छन् ।