शल्यक्रियापछि सुत्केरीको मृत्यु

विराटनगर । मोरङमा शल्यक्रिया गरिएको ९ घण्टापछि एक सुत्केरीको मृत्यु भएको छ । मृत्यु हुनेमा सुनवर्षी नगपालिका–९ की २५ वर्षीया सुष्मिता मण्डल हुन् ।
उनलाई रंगेली अस्पतालमा शल्यक्रियामार्फत प्रसूति गराइएको थियो । शल्यक्रियामार्फत उनको पेटबाट छोरी निकालिएको थियो । यो उनको दोस्रो सन्तान हो । उनको पहिलो सन्तान पनि छोरी हुन् ।
डा. अरुण भट्टराई नेतृत्वको टोलीले बिहीबार साँझ ५ बजेतिर उनको शल्यक्रिया गरेको थियो । शल्यक्रियापछि सामान्य अवस्थामा रहेकी सुष्मितालाई एक्कासि पेट दुख्ने र श्वास फेर्न गाह्रो हुने समस्या देखिएको थियो ।
अस्पतालका अनुसार सुत्केरीको मृत्युको कारण पत्ता लाग्न सकेको छैन । तर फोक्सोको नशा ब्लक भएर मृत्यु भएको हुनसक्ने अनुमान छ ।
अस्पतालका अनुसार आमाको मृत्यु भए पनि उनीबाट जन्मिएकी शिशुको स्वास्थ्य अवस्था भने सामान्य छ ।