काठमाडौं । श्रम, रोजगार तथा सामाजिक सुरक्षामन्त्री शेरबहादुर कुँवरले अछाम–१ मा उम्मेदवारी दर्ता गरेका छन् । त्यहाँ एमालेबाट झपट बोहरा उम्मेदवार हुन् ।
एकीकृत समाजवादी, कांग्रेस र माओवादी केन्द्रका तर्फबाट साँझा उम्मेदवार बनेका मन्त्री कुँवर यसअघि राष्ट्रियसभाका सदस्य थिए । उनको चार वर्षे कार्यकाल गत वर्ष २० फागुनमा सकिएको थियो ।
त्यसअघि उनी एकीकृत समाजवादीको राष्ट्रियसभा तर्फका प्रमुख सचेतक समेत थिए । पार्टीको केन्द्रीय सदस्य र सूदुरपश्चिम उपाध्यक्ष रहेका कुँवर ०४९ सालमा एमालेको जिल्ला कमिटी सचिवालय सदस्य बनेका थिए । २०४९ को स्थानीय तहको निर्वाचनमा जिल्ला विकास समिति अछामको उपसभापतिको पदमा निर्वाचन लडेका उनी तीन पटकसम्म एमाले अछामको अध्यक्ष बनेका थिए ।
जिल्लामा नेकपा एमालेको कुशल संगठन निर्माताका रूपमा चिरपरिचित मन्त्री कुँवर र एमालेका पूर्व उपाध्यक्ष भीम रावलको एउटै निर्वाचन क्षेत्र नम्बर १ पर्दछ । उनी २०६४ सालको पहिलो संविधानसभा चुनावमा अछाम निर्वाचन क्षेत्र नम्बर १ बाट प्रत्यक्षतर्फ विजयी भएका थिए । त्यसबेला भीम रावल समानुपातिकबाट सांसद चुनिएका थिए । मन्त्री कुँवर २०७४ मा राष्ट्रिय सभा सदस्य बनेका थिए ।
विचारमा दृढता र व्यवहारमा लचिलो हुने कुरालाई जोड दिदै आएका कुँवर यो पटकको चुनावमा पनि आफुले समाजमा गरेको योगदान र इमानदारीले मतदाताले जिताउनेमा ढुक्क छन् ।
मन्त्री कुँवर एमालेमा रहदा यसअघि अछाम–१ मा अहोरात्र भीम रावललाई जिताउन मुख्य भुमिका खेल्दै आएका थिए । कुँवर र रावल यसअघि एक अर्काका परिपुरक जस्तै थिए । तर कुँवर नेकपा एकीकृत समाजवादी तर्फ लागेपछि भने रावल सबैतिर कमजोर बनेको बिस्लेषण भइरहेको छ ।
यसपटक पनि रावललाई प्रतिनिधिसभा सदस्यको उम्मेदवारका लागि एमाले जिल्ला कमिटीले एकल सिफारिस गरेपनि केन्द्रीय कमिटीले भने रावललाई टिकट नदिएर झपट बोहरालाई अघि सारेको हो ।
बोहोरा एमालेका केन्द्रीय सदस्य एवंम जिल्ला इन्चार्ज हुन् । यो पटक एमालेबाट प्रतिनिधि सभाका उम्मेदवार बनेका उनी अघिल्लो पटक माओवादी बाट प्रदेश सभामा निर्वाचन भएका थिए ।
बोहरा उम्मेदवारी दर्ता गराउन जाँदा नेता भिम रावल निकट कार्यकर्ताले ‘नेकपा एमाले जिन्दवाद, केपी ओली मुर्दावाद’ भन्दै चर्को नाराबाजी गरेका थिए । रावलले उम्मेदवारी नपाएपछि अछाममा अहिलेपनि एमाले भित्र व्यापक असन्तुष्टि छ । जसका कारण यो पटक उम्मेदवार बनेका बोहराको पक्षमा खासै समर्थन देखिदैन् ।
रावलले टिकट नपाएपछि नेकपा एमाले अछाम जिल्ला कमिटीका चार जना सचिवालय सदस्यसहित ४० जना बढीले पार्टीको जिम्मेवारीबाट राजीनामा दिएका छन् । एमालेको तर्फबाट क्षेत्र नम्बर १ मा प्रदेश सभा सदस्य पदका लागि प्रदेश सभा ‘क’ मा देवबहादुर कुवँर र प्रदेश सभा ‘ख’ मा कृष्णप्रसाद जैसीले उम्मेदवारी दर्ता गराएका छन् ।
कांग्रेस, एकीकृत समाजवादी र माओवादी केन्द्र गठबन्धनका तर्फबाट प्रदेश सभा ‘क’ मा कांग्रेसका मेघराज खड्का र ‘ख’ मा माओवादी केन्द्रका झपट साँउदले उम्मेदवारी दर्ता गराएका छन् ।
अछाम–२ मा शाह र बोगटीद्वारा उम्मेदवारी
प्रतिनिधि सभा सदस्यका लागि अछाम–२ मा गठबन्धनका तर्फबाट नेपाली कांग्रेसका पुष्पबहादुर शाह र एमालेका यज्ञ बोगटीले उम्मेदवारी दर्ता गराएका छन् ।
यस अघि यो क्षेत्रमा २०७४ को चुनावमा पनि यीनै दुई उम्मेदवार थिए । त्यो बेला बोगटीले शाहलाई दुई हजार ८५९ मतान्तरले जितेका थिए । बोगटीले २१ हजार ९६५ मत पाएका थिए ।
पाँच वर्षपछि फेरि शाह र बोगटी बिच उहीँ मैदानमा भेट भएको छ । कांग्रेसका जिल्ला सभापति शाह यो पटक गठबन्धनका तर्फबाट एकीकृत समाजवादी र माओवादी केन्द्रका पनि साँझा उम्मेदवार हुन् भने बोगटी एमालेका एकल उम्मेदवार हुन् ।
यो निर्वाचन क्षेत्रमा प्रदेश सभा सदस्यका लागि प्रदेश ‘क’ मा गठबन्धनका तर्फबाट माओवादी केन्द्रका अक्कल रावल र एमालेका भीम बहादुर बिष्टले उम्मेदवारी दर्ता गराएका छन् । यस्तै प्रदेश ‘ख’ मा गठबन्धनका तर्फबाट कांग्रेसका मानबहादुर रावल र एमालेका शिवप्रसाद उपाध्यायले उम्मेदवारी दिएका छन् ।
चन्द्र प्रसाद ढुंगाना स्वतन्त्र उम्मेदवार
क्षेत्र नम्बर २ मा प्रतिनिधिसभा सदस्यका लागि चन्द्रप्रसाद ढुंगानाले स्वतन्त्र उम्मेदवारी दिएका छन् । उनी यसअघि कांग्रेसका उप सभापति थिए । पार्टीका नेताहरुका गतिविधि मन नपरेको भन्दै उनले पदबाट राजीनामा दिएका थिए ।
लामो समयदेखि स्वतन्त्र उम्मेदवर बन्ने साधारण सार्वजनीक गर्दै आएका ढुंगानाले पनि उम्मेदवारी दर्ता गराएका हुन् । उनी उद्योग वाणिज्य संघ अछामका पूर्व अध्यक्ष समेत हुन् ।
प्रतिक्रिया