प्रचण्ड, नेपाल र भट्टराइले रेशम चौधरीलाई भेटे

काठमाडौं । सत्तागठबन्धनका शीर्ष नेताहरुले कारागारमै पुगेर रेशम चौधरीलाई भेटेका छन् । सुविधानजक बहुमतका लागि उनीहरुले डिल्लीबजार कारागारमै पुगेर नागरिक उन्मुक्ति पार्टीका नेता रेशम चौधरीसँग भेटका हुन् ।

उनलाई भेट्न जानेमा माओवादी अध्यक्ष प्रचण्ड, एकीकृत समाजवादीका अध्यक्ष माधव नेपाल र नेपाल समाजवादी पार्टीका अध्यक्ष बाबुराम भट्टराई रहेका छन् ।

नागरिक उन्मुक्ति पार्टी संगै जसपा र स्वतन्त्र सांसदतिर पनि सत्तागठबन्धनको नजर छ । गठबन्धनमा तान्ने लक्ष्यसहित नै कारागारमै पुगेर चौधरीसँग भेट गरेका हुन् ।

प्रचण्डले सोमबार तथा नेपाल र भट्टराईले मंगलबार भेटेका थिए । प्रतिनिधिसभामा प्रत्यक्षतर्फ तीन सिट जितेको नागरिक उन्मुक्ति पार्टीले समानुपातिमा भने थ्रेसहोल्ड कटाउने सम्भावना देखिँदैन।

गठबन्धनका नेताहरूले जेलमै भेटेर तथा टेलिफोनमार्फत सरकारमा सहकार्यको प्रस्ताव गरेको नागरिक उन्मुक्ति पार्टीका प्रवक्ता दामोदर पण्डितले बताए । तर, सो पार्टीकी अध्यक्ष रञ्जिता श्रेष्ठसँग भने कुनै भेटघाट नभएको बताएकी छन् । श्रेष्ठ काठमाडौंमै छिन।