खुल्यो धरहराको पार्किङ

काठमाडौं । काठमाडौं महानगरपालिकाले धरहरासँगै निर्माण भएको पार्किङ भवनको पहिलो तलामा पार्किङ सेवा उपलब्ध गराएको छ । न्युरोडमा कालोपत्रे सडकमाथि सवारी पार्किङ निषेध गरेपछि धरहराको पार्किङ खुलेको हो ।

महानगर प्रहरी बलका प्रमुख नगर प्रहरी वरिष्ठ उपरीक्षक राजुनाथ पाण्डेका अनुसार धरहरा पार्किङ भवनको पहिलो तलामा निःशुल्क पार्किङको व्यवस्था गरिएको छ ।

‘यसअघि काठमाडौं टावर (साबिक पुरानो बसपार्क) मा निःशुल्क पार्किङ सेवा उपलब्ध गराइसकिएको छ,’ उनले भने, ‘सरोकारवालासँगको समन्वयमा धरहरा क्षेत्रमा रहेको पार्किङ भवनमा सेवा उपलब्ध गराएका हौँ।’

पाण्डेका अनुसार ५० हजार स्क्वायर फिट क्षेत्रफल निःशुल्क पार्किङका लागि उपलब्ध छ । संरचनागत रूपमा यो नेपालकै ठूलो पार्किङ संरचना रहेको महानगरले जनाएको छ ।