पाकिस्तानमा सशस्त्र विद्रोहीद्वारा २२ जनाकाे हत्या

इस्लामावाद । पाकिस्तानको दक्षिणपश्चिमी क्षेत्रमा बन्दुकधारीले सोमबार बिहान २२ जनाको गोली हानेर हत्या गरेको छ ।
सरकारी अधिकारीहरूका अनुसार सुरक्षा फौजले साम्प्रदायिक, जातीय र पृथकतावादी हिंसाविरुद्ध लडिरहेको बलुचिस्तान प्रान्तको मुसाखाइल जिल्लामा उक्त आक्रमण भएको हो ।

एएफपीका अनुसार मुसाखाइलका एक वरिष्ठ अधिकारी नजिबुल्लाह काकरले भने, ‘पञ्जाबलाई बलुचिस्तानसँग जोड्ने राजमार्गमा लडाकूहरूले धेरै बस, ट्रक र भ्यान रोक्दा भएको झडपपछि चलेको गोली लागी कम्तीमा २२ जनाको मृत्यु भएको छ भने केही घाइते भएका छन् ।’

उनले पञ्जाबबाट आउने र जाने सवारी साधनको निरीक्षण गरिएको र पञ्जाबबाट आएका व्यक्तिहरूको पहिचान गरी गोली हानिएको पनि बताएका छन् ।

मारिनेमा १९ जना पञ्जाबी र तीनजना बलोच सर्वसाधारण छन् । जिल्लाका अर्का वरिष्ठ अधिकारी हमिद जेहरीले मृतकको संख्या पुष्टि गरेको एएफपीले उल्लेख गरेको छ । ‘यो आक्रमणका लागि बलोच लिबरेशन आर्मी (बीएलए) का लडाकू जिम्मेवार रहेको देखिन्छ’ जेहरीले भनेका छन्, ‘बलोच लिबरेशन आर्मी यस क्षेत्रको सबैभन्दा सक्रिय लडाकू पृथकतावादी समूह हो ।’