केपी वलीलाई नारायण काजीले भने-अब पार्टी एकता गरौं, त्यो नभए तालमेल

काठमाडौं । नेकपा (माओवादी केन्द्र) का उपाध्यक्ष नारायणकाजी श्रेष्ठले पुनः तालमेल वा पार्टी एकताका लागि एमाले सँग प्रस्ताव गरेका छन् ।
उनले एमाले अध्यक्ष केपी शर्मा ओली समक्ष यस्तो प्रस्ताव अघि सारेका हुन् । नेपाल चीन मैत्री समाजले शनिबार काठमाडौंमा आयोजना गरेको कार्यक्रममा एमाले अध्यक्ष ओलीको ध्यानाकर्षण गराउँदै श्रेष्ठले भने, ‘नेपालको सन्दर्भमा वामपन्थी आन्दोलन कमजोर भए देश सकिन्छ ।
त्यसैले वाम शक्तिबीच पहिले तालमेल र मोर्चा त्यसपछि अर्को दिशातिर (पार्टी एकतातिर) जानुपर्ने आवश्यकता पनि हुनसक्छ । यसतर्फ गम्भीरतापूर्वक सोचौं ।’ वामशक्ति विभाजित हुँदा सबै कम्युनिष्टहरु आपसमा लडेरै सकिने र त्यसले देशभक्तिको आन्दोलन कमजोर बन्दा मुलुक नै सकिने अबस्था आउनसक्नेतर्फ गम्भीर ध्यानाकर्षण गराउँदै श्रेष्ठले ओलीसमक्ष संघ र प्रदेशको निर्वाचनमा तालमेल र एकताको प्रस्ताव राखेका हुन् ।
कार्यक्रममा अधिकांश एमाले समर्थित कार्यकर्ता थिए । तर, त्यही सार्बजनिक कार्यक्रममा श्रेष्ठले तत्कालीन नेकपाको एकता जोगाउन नसकेकोमा गम्भीर आत्मालोचनासमेत गरे । एमाले र माओवादी दुवै पार्टीमा प्रमुख नेताले जे बोले पनि ताली बजाउने, व्यक्ति पूजाको संस्कृति हुर्किरहेको संकेत गर्दै आलोचनात्मक चेतसहित अगाडि बढ्न ध्यानाकर्षण पनि गराए ।
साथै, उनले ओलीलाई इंगित गर्दै पार्टी एकता जोगाउन नसकेकोमा घटनाक्रमको गम्भीर समीक्षा गर्न सुझावसमेत दिए । ‘तुम सेर तो हम सवासेर हुन छाडिदिऊँ । घटनाक्रमको गम्भीर आत्मसमीक्षा गरौं, गल्ती कमजोरीको आत्मालोचना गरौं ।
म त पार्टी एकता जोगाउन नसकेकोमा आत्मालोचना गर्छु, अरुले पनि गरुन् । एमसिसीमा केके भयो, १९ बुँदे आरोपपत्रले के गरिदियो, एसपिपीले के गरिदियोे, सबै घटनाक्रमको समीक्षा गरौं, कमसेकम एकताको आधार बनि हालेन भने पनि तालमेल गरेर अगाडि बढौं ।’