बालाजुका अनधिकृत संरचनामा चल्यो महानगरको डोजर

काठमाडौं । बालाजुस्थित माछापोखरी क्षेत्रका अनधिकृत संरचनामाथि महानगरले डोजर लगाएर भत्काउन सुरु गरेको छ ।
काठमाडौं महानगरपालिका–१६, माछापोखरीमा अन्य ठाउँ जस्तै अनधिकृत संरचना भेटिएपछि बिहानै देखि डोजर चलाइएको नगर प्रहरी प्रमुख राजु पाण्डेले जानकारी दिए ।
गुणस्तर विभागको कार्यालय पछाडि रहेको गुम्बा क्षेत्रमा सार्वजनिक जग्गा मिचेर बनाइएका घर तथा टहरा डोजरमार्फत भत्काइएको र त्यो आसपासका अन्य संरचनामा पनि डोजर चलाइने उनले बताए ।
महानगरभित्र निर्माण भएका अनधिकृत संरचनाबारे महानगरको टोलीले दैनिक अनुगमन गरिरहेको पाण्डेले बताए ।