ढुंगाचाल्नाका पहिरो प्रभावितलाई राहत वितरण

अछाम । ढकारी गाउँपालिका–६ ढुंगाचाल्नाका पहिरो प्रभावितलाई राहत वितरण गरिएको छ । भारतमा रहेका नेपालीहरुले उनीहरुका लागि राहत उपलब्ध गराएका हुन् ।

रोजगारीको सिलसिलामा भारतमा रहेका नेपालीहरुले संकलन गरेको ५२ हजार २८० रुपैयाँको खाद्यान्न किनेर पहिरो प्रभावितलाई दिइएको छ । उनीहरुका लागि महेश विश्कर्माको पहलमा भारतमा रहेका नेपाली मार्फत दैनिक पाउने ज्यालाबाट थोरैथोरै रकम जम्मा गरेर नेपाल पठाइएको थियो ।

त्यही रकम मार्फत ढुंगाचाल्नाका पहिरो प्रभावितलाई तत्काल आवश्यक खाद्यान्न सामग्री किनेर दिइएको छ । सामाजीक अभियन्ता दिनेश बिकका अनुसार पहिरोले घर पुरिनुका साथै सबै खाद्यान्न र अन्नपात समेत नरहेपछि पीडितहरुका लागि तत्काललाई राहत स्वरुप दाल,चामल, नुन, तेल, साबुन लगायतका दैनिक आवश्यक सामग्री उपलब्ध गराइएको छ ।

पहिरोले प्रभावित ढकारी गाउँपालिका वडा नम्बर ६ ढुंगाचाल्नाको सिमाने टोलका हर्कबहादुर बुढा, उनका छोरा भरतबहादुर बुढा, सोही वडाको खम्मटोलका कृष्णबहादुर बुढा, ढुंगाचाल्ना बजारका व्यापारी रमेश बहादुर बुढा, लामासिंह टोलका शेरबहादुर थापा र तामाखानीका रतन थापाको परिवारलाई शुक्रबार राहत दिइएको हो ।

नेकपा एकीकृत समाजवादीका युवा नेता देबेन्द्र बुढा र पार्टीका वडा कमिटी अध्यक्ष पूर्ण बिक लगायतका समाजसेवीहरुको उपस्थीतिमा राहत वितरण गरिएको थियो । भारतमा रहेका नेपालीहरुले पहिरो प्रभावितका लागि राहत पठाएको यो पहिलो पटक हो ।

उनीहरुले तुर्माखाँद–५ नाडाको काँडाचौरका पहिरो प्रभावितका लागि पनि राहत पठाएका छन् । सो राहत आज शनिवार वितरण गर्ने तयारी भइरहेको सामाजिक अभियन्ता दिनेश बिकले जानकारी दिएका छन् ।