बर्दगोरिया सेती लोकमार्ग पहिचान महोत्सव आजदेखि

कैलाली । निर्माणधीन सेती राजमार्गको पहिचान र निर्माणकार्यमा दबाब सिर्जना उद्देश्यसहित आजदेखि बर्दगोरिया पहिचान महोत्सव हुने भएको छ । कैलालीको बौनियामा सञ्चालन हुन लागेको महोत्सवको सुदूरपश्चिम प्रदेशका भौतिक पूर्वाधार विकासमन्त्री प्रकाशबहादुर देउवाले उद्घान गर्ने भएका छन् । आजदेखि ९ गतेदेखि चैत १८ गतेसम्म आयोजना हुने बर्दगोरिया साहित्य तथा सांस्कृतिक मञ्चले जानकारी दिएको छ ।

निर्माणाधीन सेती लोकमार्ग चाँडै निर्माण सम्पन्न गर्न सरोकारवाला निकायहरुलाई दबाब दिन महोत्सव आयोजना गर्न लागिएको अध्यक्ष भरत ताम्राकारले जानकारी दिए । २०४२ सालबाट सेती लोकमार्गको अवधारणा अघि सारिएको भए पनि सरकारकाले काम अघि बढाउन सकेको छैन ।

विकासको ठूलो सम्भावनाको ढोका खोल्ने लोकमार्गको निर्माण सुस्त गतिमा भइरहेकाले तीव्रता दिन दबाब दिन महोत्सवको आयोजना गर्नलागिएको अध्यक्ष भरत ताम्रकारको भनाइ छ । सेती राजमार्ग भारत, नेपाल र चिन जोड्ने रणनीतिक महत्त्वको त्रिदेशीय मार्ग हो । यो सडकको निर्माण सुस्त गतिमा छ । त्यस्तै, प्रचारप्रसारको अभावमा बर्दगोरिया धाम, पुरैना ताल तथा पिरुवा क्षेत्रको विकासमा प्रभावकारी बन्न सकेको छैन ।

त्यससँगै कला, साहित्यको प्रवर्द्धन, स्थानीय धार्मिक तथा पर्यटकीय गन्तव्य बर्दगोरिया धामको पहिचानका लागि महोत्सव आयोजना हुन लागेको अध्यक्ष ताम्राकारले बताए । महोत्सवमा चर्चित राष्ट्रिय कलाकारहरुसहित सुदूरपश्चिमका चर्चित देउडा कलाकारहरुको प्रस्तुति रहनेछ ।

आज उद्घाटनसत्रमा सुदूरपश्चिमका देउडा गाउक सुरेश शाहीको प्रस्तुती रहने महासचिव लोकुसिंह ठकुरीले बताए । स्थानीय तथा राष्ट्रिय कला संस्कृति र पर्यटनलाई उजागर गर्नका लागि महोत्सवले महत्त्वपूर्ण भूमिका खेल्ने उनको भनाइ छ । महोत्सवमा यहाँका पर्यटकीय क्षेत्रका पोस्टर राखिनुका साथै रमाइलो मेला,मगर गाउँ थारु गाउँ, देउडा, थारु नाच लगायत विभिन्न संस्कृति झल्किने प्रस्तुतिसँगै ख्याति प्राप्त कलाकारहरुको प्रस्तुति रहनेछ ।

महोत्सवमा साधारण टिकट एक सय रुपैयाँ र सिजनल टिकटको ७ सय रुपैयाँ निर्धारण गरिएको छ । विद्यार्थी, जेष्ठ नागरिक, अपांगताका लागि परिचयपत्रको आधारमा ५० रुपैयाँमा टिकट उपलब्ध गराइनेछ । त्यसमध्ये टिकटबाट उठेको प्रति टिकट १ रुपैयाँ बर्दगोरियास्थित सहारा घरलाई उपलब्ध गराउने आयोजकले जनाएको छ ।